वेनाम दुश्मन

वेनाम दुश्मन

आँखा बन्द गरेपछी
पुग्छु म, अर्कै संसारमा,
कल्पनाको संसारमा
जता हेर्छु,
उनी देख्छु,
सजीएकी सुन्दर फुलहरुमाझ,
नियालेर हेर्दा,
ति फुललाई पनि
म फिका देख्छु,
उनी चम्किली,
त्यो चमक देखेर,
बत्तिमा हामफाल्ने पुताली जसरी,
म,
हुत्तिन खोज्छु
तर खै
कुन अदृष्य शक्तिले मलाई पछाडी धकेल्छ,
म खोज्दैछु त्यो शक्तिलाई,
वेनाम त्यो शक्तिलाई!!!
वेनाम त्यो दुश्मनलाई।।।
================================
१३ अक्टुबर, २०१५
विहान १०:०५
राजधानी

हरेक रात !

हरेक रात !

त्यो चम्किलो जुन,
एक तमासले हेर्दै गर्दा मैले,
सायद सोँच्दो हो मलाई देखेर
“यो भुईँमान्छे कति निर्लज्ज
जतिवेला नि मलाई घुरि बस्छ”,
तर कसरी बुझाउँ म उसलाई,
म त्यहाँ,
अरु कसैको प्रतिमा देख्छु,
ताराहरुको झुण्डको बिचमा ।

ति टिलपील तारा,
सायद आँखा झिम्काउँदै मलाई बोलाउँदै छन् क्यार
उडिजान सक्थेँ भने आज
भेटेर एक थान मायाका कुरा गर्थेँ होला
तिमीसँग गरे जस्तै गरी,
एक हातमा “एक्स्ट्रा-डार्क” कफी
अनि अर्को हातमा तिमीले नै सल्काईदिएको सुर्य चुरोट समाएर ।

सुर्य चुरोट,
जुगौँ भयो,
सल्काईदिने मान्छे नै नभएर,
चोर औंला र माझी औंलाको बिचमा च्यापी बसेको छु ।
अझै आशा छ,
तिमी आउने छौ र सलाई कोर्नुको सट्टा,
र त्यो चुरोट भुईँमा फाल्दै भन्ने छौ
“तिम्रो अोठलाई चुरोट होइन,
एक जोर अर्को ओठ सुहाउँछ “
र म
बिउँझनेछु सपनाबाट !
——————————
डिसेम्बर १२, २०१७
१२:१५ बजे
सोमबार
राजधानी

किनार

किनार

“गोलो-गोलो अन्डा,
पुलिसको डन्डा,
स्वर्ग जाने बाटो,
हनुमानको पुच्छर”
मैले “क” लेख्न नजानेकोमा चिन्तित
चिन्तामणी सरले भट्याएको हरफ हो यो।
मैले पहिलो पटक “क” लेख्दा,
कसैले मेरो गोजिभरी सुन्तले मिठाई भरिदिएको थियो
र म स्कुलबाट भागेर काफल खान जाँदा,
कसैले मेरो खबर म भन्दा पहिल्यै घर पुर्‍याईदिएको थियो !
कहिले शिक्षक, कहिले आमा जस्तो त कहिले जासुस,
यहाँ, एक पात्र
अनेकौं रुपमा देखा पर्‍यो
तर सदा मेरो साथ देखा पर्‍यो
जसलाई गुरु भनियो।

मेरो सलाम
मलाई हिँड्न सिकाउने आमालाई सलाम
मलाई जिन्दगी बुझाउने बालाई सलाम
मलाई अक्षर चिनाउने शिक्षकलाई सलाम
अनुशासन सिकाउने लाम्बद्द कमिलालाई सलाम
श्रम सिकाउने माहुरीलाई सलाम
मेरो सलाम,
सम्पुर्ण गुरुहरुमा सलाम

मेरो आग्रह
ती प्रत्येक गुरुहरुलाई
डोर्‍याई रहनु ती प्रत्येक
हराएका, विराएका, भट्किएका आत्महरुलाई,
जस्तो कि,
वैंसको मातमा
उर्लि आएको कर्णालीलाई पनि
सोझाई लान्छन् किनाराहरु